വയനാട് ഉരുൾപെട്ടലിൽ തകർന്ന മുണ്ടക്കൈയിൽ മുസ്ലിം ലീഗ് സംസ്ഥാന പ്രസിഡണ്ട് പാണക്കാട് സാദിഖലി ശിഹാബ് തങ്ങളും ദേശീയ ജനറൽ സെക്രട്ടറി പി കെ കുഞ്ഞാലിക്കുട്ടിയും സംഘവും സന്ദർശനം നടത്തി
മരണപ്പെട്ടവരുടെ ബന്ധുക്കളുടെ വേദനക്കൊപ്പം ചേര്‍ന്നുനില്‍ക്കുന്നതായും രക്ഷാപ്രവർത്തകർക്കിടയിൽ നിന്നും ആശ്വാസ വാർത്തകൾക്കായി കാത്തിരിക്കുന്നതായും സന്ദർശനത്തിന് ശേഷം അദ്ദേഹം ഫേസ്ബുക്ക് പോസ്റ്റിൽ കുറിച്ചു
ഫേസ്ബുക്ക് പോസ്റ്റിൻ്റെ പൂർണ രൂപം…….
വയനാട് മുണ്ടക്കൈയിലാണിപ്പോൾ ദുരന്തഭൂമിയിൽ . വെള്ളവും മണ്ണും പാറകഷ്ണങ്ങളും മരങ്ങളും കൂടിക്കുഴഞ്ഞുകിടക്കുന്ന ആ ഭൂമിക്കടിയില്‍ അനവധി മനുഷ്യരെ ഇപ്പോഴും രക്ഷാപ്രവര്‍ത്തകര്‍ തിരഞ്ഞുകൊണ്ടിരിക്കുകയാണ്. മുണ്ടക്കയം ടൗണ്‍ മണ്ണിനടിയിലാണ്. മണിക്കൂറുകള്‍ക്കുള്ളിലുണ്ടായ മൂന്ന് ഉരുള്‍പൊട്ടലുകളാണ് ആ നഗരത്തെ തകര്‍ത്തെറിഞ്ഞുപോയത് എന്നാണ് പ്രദേശവാസികള്‍ പറയുന്നത്. പ്രദേശത്ത് ഇപ്പോഴും മഴ പെയ്തുകൊണ്ടിരിക്കുകയാണ്.
തകര്‍ന്ന കെട്ടിടാവശിഷ്ടങ്ങള്‍ക്കിടയിലും പുതഞ്ഞുകിടക്കുന്ന ഭൂമിയിലും പ്രിയപ്പെട്ടവരായ സഹോദരങ്ങളെ തിരയുകയാണ് രക്ഷാപ്രവര്‍ത്തകര്‍. പ്രതീക്ഷകള്‍ കൈവിട്ടുപോകാതിരിക്കാന്‍, ജീവനുകള്‍ വീണ്ടെടുക്കാന്‍ അവര്‍ ആവത് പ്രയത്‌നിക്കുന്നുണ്ട്. രക്ഷാപ്രവര്‍ത്തകര്‍ ഇനിയും ആശ്വാസ വാര്‍ത്തകളെത്തിക്കുമെന്ന് തന്നെയാണ് പ്രതീക്ഷ.
പ്രിയപ്പെട്ടവരെയും കാത്തിരിക്കുന്ന നിറകണ്ണുകളും വിതുമ്പുന്ന മുഖവുമാണ് എങ്ങും കാണാനാവുന്നത്. പ്രിയപ്പെട്ടവരെ ഉരുളെടുത്തില്ലെന്ന ആശ്വാസ വാര്‍ത്ത കേള്‍ക്കാനായി കാത്തിരിക്കുന്നവര്‍. അവരോടൊപ്പം ഞങ്ങളും കാത്തിരിക്കുകയാണ്.
മരണപ്പെട്ടവരുടെ ബന്ധുക്കളുടെ വേദനക്കൊപ്പം ചേര്‍ന്നുനില്‍ക്കുന്നു. അവര്‍ക്ക് ക്ഷമ നല്‍കണമേയെന്നും പരിക്കേറ്റ് ചികിത്സയില്‍ കഴിയുന്നവര്‍ക്ക് എത്രയും പെട്ടെന്ന് ആരോഗ്യം വീണ്ടെടുക്കാന്‍ കഴിയട്ടെയെന്നും പ്രാര്‍ത്ഥിക്കുന്നു.
ഇത്തരം ദുഷ്‌കര സാഹചര്യങ്ങളെ ഒറ്റക്കെട്ടായി മറികടന്ന ചരിത്രമാണ് നമ്മള്‍ മലയാളികള്‍ക്കുള്ളത്. ഈ ദുരന്തവും നമ്മള്‍ അതിജീവിക്കുക തന്നെ ചെയ്യും.
പ്രകൃതി ക്ഷോഭങ്ങളില്‍ നിന്നും നാഥന്‍ നമ്മെ കാക്കട്ടെ. എല്ലാവരും പ്രാര്‍ത്ഥിക്കണമെന്ന് അഭ്യര്‍ത്ഥിക്കുന്നു
