ബംഗ്ലാദേശിനെതിരായ രണ്ടാം ടി20 മത്സരത്തിൽ ബൗളിങ്ങിൽ വീണ്ടും തിളങ്ങി മലയാളി താരം മിന്നുമണി. തന്റെ രണ്ടാം ഇന്റർനാഷണൽ മത്സരം മാത്രം കളിക്കുന്ന മിന്നുമണി തുടക്കക്കാരിയുടെ പരിഭവമേതുമില്ലാതെ പന്തെറിഞ്ഞ് 4 ഓവറിൽ 9 റൺസ് മാത്രം വിട്ട് നൽകി 2 വിക്കറ്റാണ് സ്വന്തമാക്കിയത്. ആദ്യം ബാറ്റ് ചെയ്ത ഇന്ത്യ പതിവില്ലാതെ തകർച്ച നേരിട്ട് നിശ്ചിത 20 ഓവറിൽ 8 വിക്കറ്റ് നഷ്ടത്തിൽ 95 റൺസ് മാത്രമാണ് നേടിയത്. ഓപ്പണിങ് വിക്കറ്റിൽ 33 റൺസിന്റെ കൂട്ടുകെട്ടുണ്ടാക്കി എന്നതല്ലാതെ മറ്റാർക്കും തിളങ്ങാനായില്ല.
ഷമീമ സുൽത്താനയെ മിന്നു തന്നെ പുറത്താക്കുകയായിരുന്നു. ബംഗ്ലാ സ്കോർ 30 എത്തിനിൽക്കുമ്പോൾ റിതുവിനെ വിക്കറ്റിന് മുന്നിൽ കുടുക്കുകയും ചെയ്തു മിന്നു. 4 ഓവറിൽ ഒരോവർ മെയ്ഡൻ ആക്കാനും മിന്നുവിന് കഴിഞ്ഞു.
ഇന്ത്യൻ ബാറ്റിങ്ങിൽ പത്താമതായി ബാറ്റിങ്ങിനിറങ്ങിയ മിന്നു 3 പന്തിൽ ഒരു ബൗണ്ടറിയടക്കം 5 റൺസ് നേടി. വരും മത്സരങ്ങളിൽ മിന്നുവിന്റെ ബാറ്റർ എന്ന നിലയിൽ കൂടിയുള്ള മികവ് പുറത്തെടുക്കാനുള്ള അവസരം കൂടുതൽ ലഭിക്കുമെന്നാണ് മലയാളികളുടെ പ്രതീക്ഷ
