കാസർകോട് ജില്ലയിലെ പാലക്കുന്ന് ടർഫ് മൈതാനത്ത് ഇരന്നതിന് യുവാവിനെയും ചോദിക്കാൻ ചെന്ന സുഹൃത്തുക്കളെയും മർദിക്കുകയും, ഭിന്നശേഷിക്കാരന്റെ കട തല്ലിത്തകർക്കുകയും ചെയ്ത കേസിൽ ജീവനക്കാരൻ അറസ്റ്റിൽ.
സംഭവം ഇങ്ങനെ…
പാലക്കുന്ന് ടർഫ് മൈതാനത്തെ ഗെയിം സെന്ററിൽ വന്നിരുന്നതിന് അർഫാത് എന്ന യുവാവിനെ ടർഫ് മൈതാന ജീവനക്കാരൻ മുഹമ്മദ് ഇർശാദ് ചോദ്യം ചെയ്യുകയും മർദിക്കുകയും ചെയ്തു. ഇതിൽ പ്രതിഷേധിച്ച അർഫാതിന്റെ സുഹൃത്തുക്കളെയും ഇർശാദ് ആക്രമിച്ചു.
ചൊവ്വാഴ്ച രാത്രി 11.30 മണിയോടെ ബ്രൗൺ കഫേ എന്ന സ്ഥാപനത്തിൽ അതിക്രമിച്ചു കയറിയ ഇർശാദ്, കടയുടെ മുന്നിൽ നിൽക്കുകയായിരുന്ന അഹ്‌മദ്‌ ശാഹിദ്, അഹ്‌മദ്‌ അൽഫാസ് എന്നിവരെ ഹെൽമെറ്റ് കൊണ്ട് അടിച്ചും സ്കൂടറിന്റെ താക്കോൽ കൊണ്ട് കുത്തിയും പരുക്കേൽപിച്ചു. തടയാൻ ചെന്ന കടയിലെ ജോലിക്കാരൻ അബ്ദുർ റഹ്‌മാനെയും ഇർശാദ് സ്കൂടറിന്റെ താക്കോൽ കൊണ്ട് കുത്തി.
തുടർന്ന് അർധരാത്രി 12.55 മണിയോടെ ഒരു മരവടിയുമായി വീണ്ടും കടയിൽ അതിക്രമിച്ചു കയറിയ ഇർശാദ്, കടയിലെ സാധനങ്ങളും ഫർണിചറുകളും അടിച്ചു തകർത്തു.
അറസ്റ്റ്
കടയുടമയുടെ പരാതിയുടെ അടിസ്ഥാനത്തിൽ ഐപിസി 457, 447, 427, 294 (ബി), 324, 506 വകുപ്പുകൾ പ്രകാരം കേസെടുത്താണ് ഇർശാദിനെ അറസ്റ്റ് ചെയ്തത്.
നഷ്ടം
കട തല്ലിത്തകർത്തതിൽ 85,000 രൂപയുടെ നഷ്ടമുണ്ടായതായി കടയുടമ പറഞ്ഞു.
